samajikkhabar.com

काठमाडौं : सरकारले दक्षिण एसीयाली क्षेत्रीय सहयोग संगठन (सार्क) को मन्त्री स्तरीय अनौपचारिक बैठक आयोजना गर्ने भएको छ ।

भदौ ९ गते सोमबारको मन्त्रिपरिषद बैठकले बैठक गर्ने निर्णय लिएको हो । सरकारका प्रवक्ता युवराज खतिवडाले अनौपचारिक बैठक आयोजन गर्नका लागि परराष्ट्रमन्त्री प्रदीपकुमार ज्ञवालीको नेतृत्वमा चार सदस्यीय प्रतिनिधिमण्डल गठन गर्ने निर्णय भएको जानकारी दिए ।

बैठकमा सार्क राष्ट्रका परराष्ट्रमन्त्रीहरू सहभागी हुने छन् । सार्क सदस्य राष्ट्र भारत र पाकिस्तानबीचको तिक्तताका कारण सार्क सम्मेलन हुन सकेको छैन ।

यसअघि सार्क सम्मेलन नेपालमा सन् २०१४ मा आयोजन भएको थियो । नेपालपछि पाकिस्तानले सार्क सम्मेलन गर्ने पालो भए पनि भारत र पाकिस्तानबीच सम्बन्ध राम्रो नभएकाले हुन सकेको छैन ।

यसैबीच सरकारले सार्क देशका मन्त्रीहरुको बैठक आयोजना गर्न लागेको हो । मन्त्रिपरिषदले श्रीलंकामा आयोजना हुने २१ औं बिमस्टेक सिनियर अफिसिअल्स मिटिङमा नेपालको तर्फबाट सहभागी हुन परराष्ट्र मन्त्रालयका सचिवको नेतृत्वमा ३ सदस्यीय प्रतिनिधि मण्डल गठन गर्ने निर्णय गरेको छ ।

samajikkhabar.com