samajikkhabar.com

काठमाडौँ : उपत्यकाका तीन जिल्ला काठमाडौं, भक्तपुर र ललितपुरका प्रमुख जिल्ला अधिकारीहरुले जारी निषेधाज्ञाबारेको निर्णय लिने जिम्मेवारी गृहमन्त्रालयलाई नै सुम्पने तयारी थालेका छन् ।

मंगलबार तीन जिल्लाका प्रजिअबीचको बैठकले गृहमन्त्रालयलाई नै निषेधाज्ञाको जिम्मेवारी सुम्पने तयारी गरेका हुन् । भर्चुअल बैठकमा सहभागी काठमाडौंका प्रजिअ जनकराज दाहाल, ललितपुरका प्रजिअ नारायणप्रसाद भट्ट र भक्तपुरकी प्रजिअ हुमकला पाण्डेले बसेर सुझावसहितको निर्णय गृहसचिव महेश्वर न्यौपानेलाई पठाउने तयारी गरेका छन् । तीनवटै प्रशासनले निषेधाज्ञाविरुद्ध सम्भावित जनआक्रोश आफूतिरै सोझिन सक्ने देखेर यसको निर्णय लिने अधिकार गृहलाई नै दिन लागेका हुन् ।

तीनवटै प्रशासनले निषेधाज्ञालाई निरन्तरता दिने नदिनेबारे आ–आफ्ना जिल्लाका स्थानीय तह, स्वास्थ्य कार्यालयसहित स्वास्थ्य मन्त्रालय, संस्कृति, पर्यटन तथा नागरिक उड्डयन मन्त्रालय, उद्योग, वाणिज्य तथा आपूर्ति मन्त्रालयलगायत सरोकार निकायसँग लिखित राय लिइसकेका छन् । उद्योग मन्त्रालयले जनस्वास्थ्यका मापदण्ड अपनाएर उद्योग कलकारखाना सञ्चालन गर्नुपर्ने राय दिएको छ । तर स्थानीय तहहरुले अझै केही साता निषेधाज्ञालाई निरन्तरता दिनुपर्ने सुझाव दिएका छन् ।

काठमाडौंका प्रजिअ जनकराज दाहालले सरोकारवाला निकायहरुबाट आएका सुझाव र बस्तुस्थितिको मूल्यांकन गरी तीन जिल्लाकै प्रशासनले सुझावसहितको प्रस्ताव गृहमन्त्रालयलाई पठाइने बताए ।

भदौ तीन गते मध्यरातिदेखि उपत्यकाका तीन जिल्लामा निषेधाज्ञा जारी भएको थियो । पहिलो पटक भदौ १० गतेसम्म कायम गरिएको निषेधाज्ञा अवधिलाई भदौ ९ गते बसेको तीन जिल्लाकै सुरक्षा समिति बैठक १७ गते रातिसम्मलाई थपेको थियो । थपिएको निषेधाज्ञा बुधबार रातिबाट सकिँदैछ ।

यो पनि पढ्नुहोस:

कोभिड अस्पताल प्रमुख पोखरेलले दिइन् राजीनामा

चितवनमा अस्पताल चहार्दा चहार्दै कोरोना सङ्क्रमणबाट तीन जनाको ज्यान गयो

लकडाउनमा सरकारी कर्मचारी : कसैलाई भ्याइनभ्याइ, कसैलाई सुतीसुती तलब

प्रचण्डले ‘गो अ हेड’ भनेपछि बामदेव गौतम यसरी भए राष्ट्रियसभामा जान तयार

महाधिवेशन सार्दै कांग्रेस, १० जिल्लामा समायोजन नै बाँकी

कक्षा १२ को परीक्षा दशैँ अगावै

samajikkhabar.com