samajikkhabar.com

तनहुँ : तनहुँको व्यास नगरपालिका-११ काे तनहुँसुरका सीता थापा मल आउने थाहा पाएपछि शुक्रबार बिहानै सार्वजनिक गाडी नचलेकाले हिँडेर दमौली आउनुभयो । 

बिहान आठ बजेदेखि नै मल लिन लाइनमा बस्नुभएका उहाँले दिउँसो ४ः३० बजे हुँदासम्म पनि मल पाउनुभएन । ‘मल पाइने आशमा दिनभर लाइनमा बस्यौँ, तर पाइएन,’ उहाँले भन्नुभयो, ‘मल सकिएको पनि होइन, मल छ तर भोलि आउनु भन्छन् ।’

मल हुँदाहुँदै पनि ४ः३० बजे नै डिपो बन्द गरेर मल बिक्रीवितरण रोकेको उहाँले गुनासो गर्नुभयो । उहाँले कसैले ३५/४० किलोसम्म मल पाए पनि कसैले भने रित्तो हात फर्कनुपरेको बताउनुभयो । कलेस्तीकी पूजा कुमाल बिहान ९ः३० बजेदेखि मल लिन लाइनमा बस्नुभयो । दिनभर लाइनमा बस्दा पनि उहाँले मल पाउनुभएन ।  ‘गाडी चलेको छैन, बिहानभरि हिँडेरै दमौली आएर लाइनमा बसियो, तर बेलुका भएपछि भोलि आउनु भनेर पठाए,’ कुमालले भन्नुभयो, ‘भोलि पनि आएर पाउने निश्चित छैन ।’

केबल १० किलो मलका लागि दिनभर लाइनमा बस्नु परे पनि नपाएको उहाँको गुनासो छ । ‘कोरोनाको जोखिममा भिडभाड गरेर लाइनमा बस्न कसलाई बाध्यता छ र,’ कुमालले भन्नुभयो, ‘धानमा मल हाल्न नपाएर धान कुहिन लागिसक्यो, तर मल खोज्दाखोज्दै हैरान भइयो ।’ उहाँलाई कोरोनाभन्दा धान कुहिएला की भन्ने चिन्ता छ । ‘अलि अलि खेती गरेको धान मल हाल्न नपाएर कुहियो भने के खाने ? ’ उहाँले प्रश्न गर्नुभयो ।  

कलेस्तीकै जौमाया कुमालले दिनभर भोकभोकै लाइनमा बसे पनि मल नपाएपछि रित्तै हात घर फर्कनुपरेको बताउनुभयो । चिनेका मान्छेलाई जतिबेला पनि मल दिएको तर आफूहरुले भने नपाएको उहाँको गुनासो छ । साँगेका विवि राईले चाहिएको बेला मल नपाएपछि कृषि पेशाप्रति नै आकर्षण घट्न सक्ने बताउनुभयो । ‘भन्नलाई कृषिप्रधान देश भनिन्छ तर चाहिएको बेला मल पाइँदैन, एक रोपनी क्षेत्रफलमा धान खेती गरेको छु । धेरै चोटी प्रयास गरे तर मल पाउन सकिँन,’ उहाँले भन्नुभयो ।

दमौलीकाे नवीन उपभोक्ता सहकारीमार्फत् मल बिक्री गर्ने दुई डिपोमा एक ट्रक मल आएको थियो । डिपोमा मल हुँदाहुँदै कृषकलाई वितरण नगरेपछि मलका लागि लाइनमा बसेका कृषकले शुक्रबार साँझ नै प्रमुख जिल्ला अधिकारी सागर आचार्यलाई भेटेर मल उपलब्ध गराइदिन माग गरे ।    

प्रमुख जिल्ला अधिकारी आचार्यले साल्ट ट्रेडिङमार्फत् आएको मल बाँकी भएको भए कृषकलाई बिक्री गर्न सम्बन्धित डिपोलाई अनुरोध गरिएको जानकारी दिनुभयो । उहाँले भन्नुभयो, ‘सहजीकरण गर्न प्रहरीलाई निर्देशन दिएको छु ।’

प्रमुख जिल्ला अधिकारी आचार्यको आश्वासनपछि पुनः डिपोमा पुगेका कृषकले मल पाएनन् । त्यसबीचमा डिपोका प्रतिनिधिहरु डिपो बन्द गरेर हिँडिसकेका थिए । नवीन उपभोक्ता सहकारी संस्थाका अध्यक्ष र प्रतिनिधिलाई सम्पर्क गर्न खोजे पनि फोन उठेन । 

samajikkhabar.com